नेइमारको चिन्तामा ब्राजिल, कहिले खेल्न सक्छन् ?

मुख्य प्रशिक्षक कार्लो आन्सेलोटीले नेइमार अझै पूर्ण रूपमा फिट नभएको पुष्टि गर्दै उनी टोलीसँग प्रशिक्षणमा फर्किन केही समय लाग्ने बताएका हुन् ।

ब्राजिलले विश्वकप अभियानको सुरुआती खेल भोली बिहान ३.४५ बजेदेखि मोरक्कोसँग गर्दैछ। तर टोलीका सर्वाधिक गोलकर्ता नेइमार चोटका कारण उपलब्ध नहुने भएका हुन् । सान्तोसका खेलाडी नेइमार प्रतियोगिताअघि सुरु भएको राष्ट्रिय टोलीको प्रशिक्षण शिविरदेखि नै टोलीबाहिर छन् ।

समर्थकहरूले उद्घाटन खेलअघि नेइमार फिट हुने अपेक्षा गरेका थिए । तर मोरक्कोविरुद्धको खेलअघिको पत्रकार सम्मेलनमा आन्सेलोटीले त्यस सम्भावनालाई समाप्त पार्दै उनी खेल्न तयार नरहेको स्पष्ट पारे ।

ब्राजिलले अब समूह चरणको सबैभन्दा कठिन चुनौतीमध्ये एक मानिएको मोरक्कोविरुद्धको खेल आफ्ना अनुभवी खेलाडीबिनै खेल्नुपर्ने भएको छ । चिकित्सकहरूले नेइमारको चोटलाई दोस्रो तहको पिण्डुला मांसपेशीको समस्या भएको बताएका छन् । त्यसैले उनी हाल व्यक्तिगत पुनर्स्थापना कार्यक्रमअन्तर्गत उपचार गरिरहेका छन् ।

आन्सेलोटीले नेइमारको अवस्थाबारे जानकारी दिँदै भने- 'नेइमार सकेसम्म छिटो निको हुन निकै मेहनत गरिरहेका छन् । अर्को साता उनी टोलीको सामूहिक प्रशिक्षणमा फर्किन सक्ने अपेक्षा गरेका छौँ ।' उनले थपे- 'हामीले नेइमारलाई केवल उनको उत्कृष्ट खेल क्षमताका कारण मात्र टोलीमा समावेश गरेका होइनौँ । युवा खेलाडीहरूका लागि उनको अनुभव र नेतृत्व पनि उत्तिकै महत्वपूर्ण छ ।'

यद्यपि ब्राजिलले नेयमारको पुनरागमनबारे आशावादी दृष्टिकोण राखे पनि उनको अनुपस्थिति मोरक्कोविरुद्धको खेलमा मात्र सीमित नहुन सक्ने चिन्ता बढिरहेको छ । प्रारम्भिक चिकित्सकीय मूल्याङ्कनअनुसार उनलाई पूर्ण रूपमा निको हुन दुईदेखि तीन सातासम्म लाग्न सक्ने बताइएको थियो । यसले उनलाई जुन २० मा हुने हैटीविरुद्धको दोस्रो समूह चरणको खेलसम्म फर्कने सम्भावना दिएको छ ।

तर लामो समय मैदानबाहिर रहँदा खेल लयमा फर्किने विषय ब्राजिलका प्रशिक्षक र चिकित्सा टोलीका लागि मुख्य चिन्ताको विषय बनेको छ । नेइमारले मे १७ यता कुनै प्रतिस्पर्धात्मक खेल खेलेका छैनन् । साथै उनको विगतमा पटक–पटक चोट दोहोरिने इतिहास भएकाले टोली व्यवस्थापन हतारमा मैदानमा फर्काउने पक्षमा छैन ।

यस कारण समूह चरणमा नेइमारको भूमिका अझै अनिश्चित बनेको छ। ब्राजिलले प्रतियोगिताको सुरुआती चरण आफ्ना सबैभन्दा अनुभवी खेलाडीमध्ये एकबिनै पार गर्नुपर्ने अवस्था आएको छ भने चिकित्सा टोलीले उनको स्वास्थ्य अवस्थामाथि निरन्तर निगरानी गरिरहेको छ।

ब्राजिलको प्राथमिकता प्रतियोगिताको पछिल्लो चरणका लागि नेइमारलाई पूर्ण रूपमा फिट बनाउने रहेको देखिन्छ । उनी हैटीविरुद्धको खेलमै फर्किनेछन् वा त्यसपछि मात्र मैदानमा उत्रनेछन् भन्ने विषय अहिले ब्राजिलका लागि सबैभन्दा ठूलो प्रश्न बनेको छ ।