पाटन अस्पतालको ओपिटी सेवा बन्द, सयौ बिरामी उपचारबाट बन्चित

पाटन अस्पातलले इमरजेन्सी सेवा भने २४ घण्टा नै खुला राखेको छ । बिहीबार ओपिटी सेवामा उपचार गर्न अस्पताल पुगेका विरामीहरुको टिकट काउन्टरमा ठूलो भिड देखिन्थियो । सवै विरामीहरु टिकट काउन्टर किन नखुलेको ? भन्दै सिक्योरिटी गार्डलाई सोध्दै थिए ।

सिक्योरिटी गार्ड भने ठूलो स्वरले भन्दै थिए-'डाक्टहरु आन्दोलनमा गएका छन् । विरामीलाई गाह्रो भए इमरजेन्सीमा लैजाने, ओपिटी कहिले खुल्छ थाहा छैन, समाचार सुन्दै गर्नुहोला । सरकार र चिकित्सक बिच कहिले सहमति हुन्छ । त्यसपछि ओपिटी खुल्छ ।'

पाटन अस्पतालले बिहीबार बिहान ८ बजेसम्म टिकट खुलाएको थियो ।

ओपिटी सेवा बन्द भएपछि नुवाकोट घर भएका हाल पाटन बस्दै आएका कृष्ण श्रेष्ठले आफ्नो श्रीमतीलाई उपचार नगरी फर्किन परेको बताए । उनको श्रीमती गरिमा श्रेष्ठ गर्भवती हुन् । चिकित्सकहरु आन्दोलनमा हिडेपछि श्रेष्ठ जस्तो पाटन अस्पताल आएका सयौ संख्यामा विरामीहरु उपचार नपाएर घर फर्किएका छन् ।

चिकित्सकमाथि बारम्बार आक्रमण भएको भन्दै चिकित्सकहरू केही दिने अघिदेखि आन्दोलितमा होमिएका छन् । स्वास्थ्यकर्मीहरूले स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन, २०७९ अविलम्ब कार्यान्वयनको माग समेत राख्दै आएका छन् ।

चिकित्सकमाथि हातपात गर्नेहरुलाई पक्राउ गरेर कारबाही गर्नु पर्ने डाक्टरहरुले बताउँदै आएका छन् । चिकित्सकको सुरक्षा ग्यारेन्टी नभएसम्म काममा नफर्किने रेसिडेन्ट डाक्टरहरूले अडान लिएका छन् । आवासीय चिकित्सकहरू फ्रन्टलाइनमा धेरै समय खटिने हुँदा बढी आक्रमणमा उनीहरू नै पर्ने गरेका छन् ।