बीमालेख धितोमा झण्डै खर्ब कर्जा प्रवाह, नेपाल लाइफबाट बीमितले लिए सर्वाधिक

काठमाडौं । जीवन बीमा कम्पनीहरूले करिब एक खर्ब रुपैयाँ बराबरको कर्जा प्रवाह गरेका छन् । चालु आर्थिक वर्षको पहिलो ६ महिना अर्थात पुस मसान्तसम्ममा बीमालेख धितो राखेर बीमितहरूलाई ९५ अर्ब ३३ करोड रुपैयाँभन्दा बढी कर्जा लिएका हुन् । समग्र वाणिज्य बैंकको कर्जाभन्दा जीवन बीमा कम्पनीहरुबाट प्रवाहित कर्जाको बढोत्तरी धेरै देखिएको छ । चालु आवको माघसम्म वाणिज्य बैंकको कर्जा लगानी ५.६२ प्रतिशत विस्तार भएकोमा बीमालेख धितोमा प्रवाहित हुने कर्जा चालू आर्थिक वर्षको दोस्रो त्रैमाससम्म ६.६२ प्रतिशतले वृद्धि भएको हो । तथ्यांक अनुसार गत आवको दोस्रो त्रैमास (२०८० पुससम्म) मा जीवन बीमक कम्पनीहरूले ८९ अर्ब ४१ करोड रुपैयाँभन्दा बढी कर्जा प्रवाह गरेका थिए । गत आवको सोही अवधिको तुलनामा समीक्षा अवधिमा कर्जा प्रवाह अर्ब करोड रुपैयाँले बढेर ९५ अर्ब ३३ करोड रुपैयाँ पुगेको हो । नेपाल लाइफ इन्स्योरेन्स कम्पनी बीमालेख धितोमा सबैभन्दा बढी कर्जा प्रवाह गर्ने कम्पनीको सूचीमा अग्रस्थानमा रहेको छ। नेपाल लाइफले यो अवधिमा ३५ अर्ब २४ करोड रुपैयाँ कर्जा प्रवाह गरेको छ । जसले यसलाई प्रमुख जीवन बीमा कम्पनीहरूको अग्र पंक्तिमा अघि बढाएको छ। यसका अतिरिक्त, एलआईसी नेपालले २१ अर्ब ८३ करोड रुपैयाँ, नेशनल लाइफले ११ अर्ब ५६ करोड रुपैयाँ, हिमालयन लाइफले ७ अर्ब ३८ करोड रुपैयाँ र एशियन लाइफले ५ अर्ब १ करोड रुपैयाँ कर्जा प्रवाह गरेका छन् । अन्य प्रमुख कम्पनीहरूमा सूर्यज्योति लाइफले ४ अर्ब ४४ करोड रुपैयाँ, राष्ट्रिय जीवन बीमा कम्पनीले २ अर्ब ६७ करोड रुपैयाँ, मेट अमेरिकन लाइफले १ अर्ब ८१ करोड रुपैयाँ, सानिमा रिलायन्सले १ अर्ब ३६ करोड रुपैयाँ, प्रभु महालक्ष्मी लाइफले १ अर्ब १३ करोड रुपैयाँ कर्जा प्रवाह गरेका छन् ।